Microsoft na Meta byasinye amasezerano yo kwishyura amakuru bikura kuri Wikipedia

Ni intambwe ikomeye kuri iki kigo gifatwa nk’ikidaharanira inyungu, mu kwinjiza amafaranga akomoka ku bigo bikoresha amakuru yabyo.

Wikimedia Foundation yatangaje ko inafitanye amasezerano n’ibigo bindi biteza imbere ikoranabuhanga ry’ubwenge buhangano nka Perplexity yo muri Amerika na Mistral AI yo mu Bufaransa.

Mu 2022 na bwo Wikimedia yagiranye amasezerano na Alphabet igenzura Google ari muri uyu murongo.

Amakuru ari kuri Wikipedia ni ingenzi mu gutoza porogaramu za AI, kuko habarizwa inyandiko zigera kuri miliyoni 65 mu ndimi zirenga 300.

Uburenganzira bwo gukoresha serivisi za Wikipedia butangwa n’ikigo cya Wikimedia Enterprise, kikabutanga mu buryo bwihuse, bwizewe ndetse bwaremewe gukoreshwa n’ibigo binini.

Umuyobozi wa Wikimedia Enterprise,Lane Becker, ati “Wikipedia ni ingenzi kuri ibi bigo by’ikoranabuhanga. Ni yo mpamvu bikwiriye kureba uburyo byadufasha mu bijyanye n’amikoro.”

Wikipedia ifite abakorerabushake barenga 250.000 bandika, bakanakosora amakuru yose ashyirwa kuri uru rubuga. Ni amakuru yizewe ku buryo afatwa nk’imari ikomeye n’ibi bigo by’ikoranabuhanga.