U Bushinwa bwifuza kohereza satellite ibihumbi 200 mu isanzure

Amakuru agaragaza ko ku wa 29 Ukuboza 2025 ari bwo ibigo bibiri byo mu Bushinwa byatanze ubusabe bwo kohereza izi satellite mu isanzure.

Ubusabe bwo kohereza izo satellite bwahawe ikigo Mpuzamahanga mu bijyanye n’itumanaho, ishami rya Loni rishinzwe ibirimo ibijyanye n’isanzure.

Muri ubwo busabe hagaragazwa ko abandi bashaka kohereza satellite bagomba kugaragaza uko zitazabangamira imikorere yazo mu isanzure.

Ni ubusabe butanzwe mu gihe u Bushinwa na Amerika bikomeje guhangana mu bijyanye n’isanzure n’ikoranabuhanga riyishingiyeho.

Hasabwaga ko hoherezwa nibura satellite 96.714 kuri buri cyiciro zigomba gushyirwa ahantu harenga 3660. Ni ibyiciro byiswe CTC-1 na CTC-2.

Mu gihe u Bushinwa bwaba bwamaze kubaka neza uburyo bwa satellite, bukemererwa kohereza umubare bwasabiye uburenganzira bwarusha kure ubushobozi bwa SpaceX yifuza kohereza nibura satellite za Starlink 49.000.

Ayo mapaki abiri y’u Bushinwa yiswe CTC-1 na CTC-2 yaba ihuriro rigari rya mbere mu bijyanye na satellite zoherejwe mu isanzure kandi byazagora ibindi bigo bihanganye mu by’isanzure kubona umwanya mu gice cyaryo kirushijeho kwegera Isi.

Nubwo inzego zitandukanye mu Bushinwa ntacyo zitangaza kuri ibi, abahanga bavuga ko uko guhuza imbaraga gushobora gutera impungenge ku bibazo bishingiye ku mutekano.

Nk’uko byatangajwe na China in Space, Kaminuza ya Nanjing yigisha ibijyanye n’Ikoranabuhanga mu bijyanye n’isanzure (Aeronautics) ivuga ko izi satellite zizibanda cyane ku bijyanye n’umutekano, uburyo bw’ubwirinzi no kugenzura umutekano wo mu kirere.

Bivugwa ko izo satellite zishobora gukora kimwe n’iza SpaceX zikoreshwa n’igisirikare cya Amerika mu nyungu z’umutekano n’itumanaho.